4/7/07

عن اللقاء الأول

لسادة الافاضل زوار مدونة حنتكلم
بما ان معظم الحاضرين في البوست الي فات محضروش اللقاء من اصله
فاسمحولي الخصلكم الأحداث بإيجاز ، الي حضروا اللقاء تقريبا كله كانو
حنتكلم
بن ناصر
فارس
سكوت هنصوت
شارم
احمد المصري

بالإضافة لمجموعة دخلت سياحة وخرجت تاني..زي المريب ...احترت معاك معاك انا..
الي حيرنا كلنا معاه
منغير مناسبه
سارة دخلت دقايق وخرجت..يبدو انها مشكلة شبكة..اما اماني فإعتذرت تماما من البداية
اذا صفصف اللقاء على السته الي فوق...طبعا كان في شويه امور تنظيمية تولاها بجدارة العزيز حنتكلم
من حيث شروط الكلام...و طريقة عرض الافكار...ما هو زي ما نتو عارفين احنا ملوك الهزار والفرفشة
وساعة الحظ ماتتعوضش...فطبعا اي كلمة تحتمل معنيين كانت بتدخلنا فقافية نكت
لولا حنتكلم ماكناش خرجنا منها ابدا ...وكنا قضينا الساعتين فساعة لقلبك
والملك الكبير في القصة دي هو العزيز ابن ناصر...
الي ماطلعش لأبوه ناصر كشري وكلامة قليل
لا ربنا نفخ فغدة اللطافة عنده للصبح...بس الشهاده لله هو فعلا عنده حس دعابي عالي
وقدر يكسر شويه جديه الموضوع...وطبعا حنتكلم..ماداش فرصة للهزار انه يستشري...بإستثناء كده
نقدر نقول ان التجربة كانت الى حد كبير ديموقراطيا ناجحة...قدرنا نقول اراء مختلفة منغير تجريح في اي حد
كمان كان فيه اختزال في عرض الأراء وده شئ رائع..يعني الي كان بيمسك الميكروفون
كان بيعرض رايه بسرعة واختزال ويسيبه للي بعده
حنتكلم كان اقلنا كلاما لكن اكثرنا تنظميا...كل ده عن الموضوع اما الإقتراحات نفسها
فتراوحت ما بين الأتي
• العمل الإجتماعي الخالص بدون اي شبهة سياسية...زي اي عمل خيري وخلاص..والفلسفة وراه ان الخير الخاص هيأدي في النهاية لخير عام..وبكده مش هنستفز السلطة فهيسيبونا نشتغل...
نسبة الموافقة عليه كانت حوالي 20% فقط .و كان الإعتراض إزاي ننضف علبه كبريت جوة زريبة
• الإقتراح الثاني كان العمل الإجتماعي من خلال مؤسسة فعالة بالفعل..زي صحفيون بلا حدود او اي حزب موجود بالفعل..والموافقة عليه كانت حوالي 75% لكن بس على المبدأ اما اختيار الجهة المنظمة الي هننضملها فكان محل خلاف..انتهى بإننا اتفقنا نعمل بحث خلال الإسبوع عن الرموز الرئيسية المقترحة عشان نشوف ايها تناسب الأجندة الخاصة بينا
• اما الإقتراح الأخير
قكان اننا نظل مدونين بدون الإنخراط في اي جهة ممكن تسيسنا..ونمارس برضة العمل الإجتماعي منغير قولبة
ومش مهم التبعات..يعني مش مهم الحكومة تراقبنا او تقبض علينا مادمنا مؤمنين بالي بنعملة
, وطبعا الإقتراح ده مالاقاش استحسان قوي..قكان نسبة الممؤيدين ليه برضة حوالي 20%.
إذا خلصنا في النهاية ان كلنا متفقين على الأتي
1. حكم الإغلبية هو الي هيسود بصرف النظر عاجبنا ولا لا...ده اساس الديموقراطية
2. فيه هامش واسع من حريه الحركة لكل فرد طالما انه في اطار المضمون العام
3. العمل الإجتماعي هو اساس الفتره الي جايه.
4. السياسة الهادئة اقرب الطرق لقلوب الجميع .
طبعا اجمل حاجة ان اللقاء اخد حوالي 160 دقيقة قلنا فيهم كلام كتير..فمحسناش ان الوقت ضاع هباء
المره الي جايه يكون نسبه الحضور اعلى وبالتالي افكار واراء اكتبر
ده تصوري عن نتائج اللقاء
اتمنى اني اكون نقلتلكم صورة صادقة و محايده عنه
واشكرك يا تامر على الفرصة دي الي خلتنا نشوف نماذج مشرفة من الشباب
يا جماعة الي فعلا عايز يغير...دي فرصته انه يقول كلمة
سلام

13 Comments:

أمــانــى said...

يااااااااااارب يكون بداية موفقة وانا بأعتذر الظروف اقوى منى
وانا من رايى العمل الاجتماعى فى الفترة دى والقادمة افضل بكثير من العمل السياسى اللى مالوش صوت فى ظل القوانين والنظام
فيبقى العمل الاجتماعى افضل بكتير
وربنا يوفقكم جميــعا

سكوت هنصوت said...

أماني افتقدناكي في اللقاء...يا رب انشاء الله المره الي جايه الدنيا تبقى افضل..و تقدري تشاركينا باراءك وافكارك...حتى عشان تونسيني بالوجود الأنثوي لحسن شكلنا كده وحش قوي..

أمــانــى said...

الله يخليكى يا جميل وانشاء الله ححاول
مش عارفه والله بنات ايه دى يقولوا المساواة يختى وفى الاخر هما اللى ينسحبوا ما ده برضو المساواه
انا ضد المساواة بصراحة لاننا منفعش غير فى الكلام
واكيد ححاول جاهدة المرة القادمة اكون معاكم ان شاء الله

7ntklm said...

الزميلة سكوت هنصور

- اشكرك على تواجدك معنا فى القاء الذى جمعنا

- وايضاً على مجهودك الذى اسهمتى به من بداية عرض الفكرة فى البوست السابق

بنسبة للتقرير الرئع الذى اسهمتى به الضحك قليل المرة دي .. لكن لديك طريقة في التدوين ماحصلتش

تشعر من يتصفح تقريرك و كانه يعيش ومتواجد فى كل ماتحكيه

- اشكر كل الزملاء ابن ناصر , فارس , شارم, احمد المصرى على حضورهم الجيد

وقتراحتهم واسهامتهم الفكرية الايجابيا للخروج من هذا القاء بعمل ونشاط يليق بمستوى المشاركة وحضورهم الرائع

اكتسبت من لقاء امس الامل فى الاستمرار والوجود والمشاركة الفعالة والرغبة فى التعاون من اجل الاصلاح وفرد وجودنا

فلا يأس ولا ضعف

تشرفت بمعرفة اصدقاء تتقارب اعمرنا وتتقارب افكرنا ايضاً ويجمعنة هدف واحد وهو الاصلاح والتغير

سيتجدد القاء فى الاسبوع القادم

ولـى عودة

Ahmed Elmasry said...

الحمد لله و تجمعنا يعتبر مجرد بدايه فطريق أن شاء الله طريق توعيه الناس و تحرير حريتنا

Iman said...

والله انا فى قمه اسفى ليكوا علشان الوقت ما اسعفنيش انى احضر الجلسه
مبدأيا انا بهنيكوا على الجلسه دى وانا متفقه معاكوا فى كل القرارات اللى اخدوتها فى الجلسه
عايزيين بقى ندخل حيز التنفيذ...عيزين نبتدى نلم بعض ونجتمع كلنا فى العلن مش على النت بس
يعنى اللى فى القاهره يجتموا سوا واللى فى اسكندريه برضه يجتموا وهكذا
ونبتدى نرتب افكارنا ونبدء العمل الجماعى المتفق عليه وطبعا حيكون هو هو فى كل المحافظات
عايزيين المره الجايه نعمل دراسه جدوى كدا نحصر فيها اماكن تواجدنا
واتمنى المره الجايه يكون عددنا اكبر ونعرف بعض اكتر عشان منضيع وقت ونبدأ

ibn nasser - ابن ناصر said...

وسع يابني واضرب سلا م مربع ,,لاباشا جه
كرسي في الكلوب ,,,
انا هقل المدونه دي ,,بقي انا بتاع كشري ومالاقيش كومنت واحده اعتراض ,,ماشي ماشي يا ويلي من الانتقااام
أعنف تحياتي
....

ibn nasser - ابن ناصر said...

ههههه قالك يه قالك العزيز ابن ناصر ,,عزيز مين انتوا خليتو فيها عزيز ,يالا افرحوا ادي رجلي اتكسر تمزق في الاربطه وكسر في الكاحل النهارده نكسه,,,نكسه لكل المصرين ,,,مصر ,,مصر اتصابت النهارده يا علي
هههههههههههههههههههههههه
تحياتي الي الجميع

ibn nasser - ابن ناصر said...

ايه رأيك نعمل كلنا مدونه مع بعض !؟

7ntklm said...

ibn nasser- ابن ناصر

انت بجد اتكسرت :d


ولا يتقول كدا علشان تهرب من وجبك الاسبوع دا

-----------
- نعمل مدونة لينا كلنا هنشوف راى باقى الناس ايه

سكوت هنصوت said...

ابن ناصر اتهزم يا رجاله...اتاري الراديو طول النهار مارشات عسكرية وقران...الف سلامة عليك يا بن ناصر,....انا موافقة على اقتراحك بتاع مدونة واحده...بس لما نشوف هنقدم فيها ايه ورأي الناس ايه...لحسن ينتهى بينا الحال بنكتب لبعض...عند نوارة كان فيه واحد اسمة دودو كاتب كلام جامد قوي...انا عزمته عندك ياحنتكلم ....معلش بقة مهو البيت بيتي...ابقوا اقروا كلامة و شوفوا احنا ممكن نستفيد منه ازاي للقاء القادم....سلامتك مرة تانيه يا بن ناصر

ibn nasser - ابن ناصر said...

اول جاجه هذه ليست هزيمه بل نصر ,,الدكتور قالي مافيش حد يقدر يمشي عليها ,هو انت جيت ازاي ؟!؟ تاني حاجه انتي اللي كسرتيني حتي مافيش اعتذار تحت وبعدين حد قاللي اني بغد مامشيت امبارح قاعدتوا تدعوا عليا وقلتوا احسن انه مشي
تحياتي

bentfalestine said...

تحياتي
اتمنالكم بداية موفقه بس انا ما عرفت بالموعد الا متاخر , عارفه عذر اقبح من ذنب ,, لا عذر لدي اسوقه اليكم
كثير فرحت بالفكره و اتمنالكم التوفيق و تحقيق الهدف و لعله يكون لي مقعد بلقائكم القادم و دمتم بسلام