متر الأرض في طابا بجنيه ونص

قرب يا بيه ..

قرب يا مُحترم

متر الأرض في طابا بجنيه ونص

بتقول كام يا عم

جينه ونص للمتر ؟وفين في طابا اللي مساحتها لا تتعدى 2 مليوت متر مربع ؟

يعني الخواجه هايشتري أكتر من ربع طابا ؟

بجنيه ونص

أما اليهود دول طلعوا أغبية بشكل حروب ودمار ونار وأسرى وقلة أدب لأكثر من 50 عاماً

وفي الأخير طلع الموضوع زي شكة الدبوس يعني بدل ده كله ما كانوا دفعوا الجنيه ونص في المتر

واخدوا طابا من بابها تشطيب لوكس وعالمفتاح ؟

ممكن ناس تقول إني بأهطرش أو بأخرف

..لكن هو ده اللي حصل وبيحصل في عهد صاحب العزبة

وما خفي كان أعظم

يعني الموضوع داخل في عشرين سنة ورحته ما فاحتش للرأي العام الا لما أتهبدنا حكم دولى وبقينا سوابق وهي دي البهدلة اللي بتحصل في مصر دلوقت وهو ده الحكم المبدئي اللي صدر

للخواجه / وجيه سيجال الإيطالي الجنسيةعل اللي من أب مصري اللي أشترى 650 ألف متر مربع في طابا سنة 89 على 150 قرشاً عداً ونقداً للمتر

يعني دفع للدولة 950 ألف عشان يعمل قرية سياحية هناك وبعد ما العملية نامت راح سنة 94 عمل عقد شراكة مع شركة يهودية لتمويل المشروع هنا تدخلت الدولة وقالت له حاسب عندك وسحبت منه الأرض بعد ما صرف على حد كلامه أكثر من 53 مليون جنيه ورفع قضايا أمام المحاكم المصرية وحكمو له بتعويض والدولة بلطجت وما دفعتش راح شككنا قضية في امريكا وأتحكم له مبدئاً بـ 50 مليون دولار تعويض شراكة برضوا

يابن اللئيمة ولا أنت كنت مجرد عروسة ماريونيت بيحركوك الصهاينة من وراء الستار

ولا ليه أشتمك إنت مالكش ذنب

ما هو اللي بيبيع أرضه ويفرط في عِرضه يستاهل اللي يجرا له ومالوش حق يرجع يعيط ويقول مش لاعب أنا طلعت عيل وعايز أرضي تاني ... ياريت هاتقف على كده العملية ده هايحصل زي ما بنشوف في

الأفلام المصرية الحمضانه

هاياخد الحكم ده ويبهدلنا بقضايا تعويضات مادية ومعنوية تاني لإننا جرحنا إحساسه جينه ونص

يا بلاش ده تمن ساندوتش فول من غير حاجه ساقعه تبلعه ؟

جنيه ونص في أرض مرويه بدماء ألاف المصريين .مسلمين ومسيحيين ؟

جنيه ونص في أرض ما كانتش كملت سنة راجعه لنا بعد حروب ومفاوضات ومحاكم إنتهت بحكم تاريخي لرجوع طابا لمصر سنة 88

تقوم إنت تبيعها بتراب الفلوس بعدها بسنة ؟

حسبنا الله ونعم الوكيل على من فعلوا بنا ما لم يفعله التتار او الصهاينة